Stuttnefja

Almennar upplýsingar

Stuttnefja er fremur stór svartfugl sem svipar mjög til langvíu. Á sumrin er hún svört að ofan en hvít að neðan, síður hvítar án ráka. Hvítir jaðrar armflugfjaðra mynda ljósa rák á aðfelldum væng. Á veturna teygist hvítur litur bringunnar upp á kverk. Kynin eru eins.

Fluglag og hegðun eru í grundvallaratriðum eins og hjá langvíu. Stuttnefja er best greind frá langvíu á hvítum síðum, dekkri lit að ofan, styttri og þykkari goggi með hvítri goggrönd, brattara enni og kantaðri kolli og á veturna á hvítum vöngum. Höfuðlag er annað en á álku, auk þess er stuttnefja hálslengri og stélstyttri. Hún flýgur með kýttan háls og er fimur kafari. Er afar félagslynd.

Fæða og fæðuhættir:
Kafar eftir fæðunni og knýr sig áfram með vængjunum neðansjávar líkt og aðrir svartfuglar. Aðalfæðan er loðna, en tekur einnig síli, síld, annan smáfisk, ljósátu og marflær.

Fræðiheiti: Uria lomvia

Kjörlendi og varpstöðvar

Verpur í stórum byggðum í fuglabjörgum. Egginu er orpið á berar syllur, hreiðurgerð er engin. Stuttnefja er oft á mjórri syllum en langvía og stundum í stökum pörum. Er annars á sjó og er meiri úthafsfugl en langvía. Ungi yfirgefur varpsyllu löngu áður en hann er fleygur, um þriggja vikna gamall, um miðjan júlí.

Varp- og ungatímabil

Dvalartími á Íslandi